今屆世冠盃雲集各大洲勁旅，中國雖然冇球隊參賽，但就有個中國球員周通有份參賽。效力奧克蘭嘅周通，首仗0比10慘敗拜仁慕尼黑後備落場，係佢繼2023年對伊蒂哈德後，第2次出戰世冠盃。呢位35歲老將表示3年前為老婆學業出國，結果打出另一片天。
司職翼鋒嘅周通踢過大連、武漢、天津等球會，2022年係佢表現最好一季，但因機緣巧合竟然選擇出國：「我老婆係上海戲劇學院導演系研究生，疫情期間有新西蘭大學取錄佢，當時又有咗細路，老婆建議我換一個生活方式，老婆一直為呢個家付出，我都應該為屋企做啲事。」
周通坦承當時好難選擇：「嗰年係我狀態最好嘅時間，諗起出國之後可能冇波踢，我就好辛苦。結果喺一次機緣巧合，有朋友幫我聯絡新西蘭幾支球隊，奧克蘭主席親自搵我，喺咖啡店飲咗一杯就傾掂咗，就係咁神奇！我嘅人生總係充滿運氣同選擇。」